संवाद

धुक्याच्या मिठीने शहारलेल्या सकाळी
गवतावर अल्लद पावले उमटवत
तुला चालताना पाहिले,
तुझ्या पायातल्या नाजूक पैंजणाची 
गोड किणकिण ऐकली आणि वाटले….
आता ओठांवरल्या शब्दांनी सरळ मौनात जावे आपले. 

पाऊसधारांनी आळसावलेल्या सकाळी
ओलेत्या रस्त्यावरुन पावले सावरत 
तुला चालताना पाहिले, 
गालांवरून ओघळणाऱ्या थेंबांना
नजाकतीने दूर करताना तुला पाहिले आणि वाटले….
आता ओठांवरल्या शब्दांनी सरळ मौनात जावे आपले.

वसंताच्या मोहाने बहरलेल्या सकाळी
दरवळत्या रस्त्यावरून पावले रेंगाळत
तुला चालताना पाहिले,
नाजूकशा फुलांना नाजूकतेनेच 
केसांत माळताना तुला पाहिले आणि वाटले….
आता ओठांवरल्या शब्दांनी सरळ मौनात जावे आपले.

वाऱ्याच्या नशेने धुंदावलेल्या सकाळी
भिरभिरत्या पाचोळ्याला न जुमानता पावले टाकत
तुला चालताना पाहिले,
वाऱ्याच्या मुजोरीशी सामना करत 
उडणाऱ्या पदराला सावरताना तुला पाहिले आणि वाटले….
आता ओठांवरल्या शब्दांनी सरळ मौनात जावे आपले. 

शरदाच्या चांदण्याने मधाळलेल्या रात्री
झुलणाऱ्या झुल्यावर पावलांना शांतवत
तुला बसलेली पाहिले,
माझ्या चोरट्या नजरेला तुझ्या मोहक नजरेत 
अडकवत तू ही मला पाहिले आणि वाटले….
बरं झालं शब्द मौनात गेले कारण
जे शब्दांना नसते जमले ते नजरेच्या संवादाने जमले. 

जस्मिन जोगळेकर
०४/०१/२०२४.

टिप्पण्या

टिप्पणी पोस्ट करा

या ब्लॉगवरील लोकप्रिय पोस्ट

शिस्त

शिस्त.... कधीकधी पसारा आवरायला घेतला की, कपाटातल्या कप्प्यात सापडतं काय काय… कुठल्याशा मंदिरातली अभिषेकाची पावती… एखाद्या महिन्यातल्या किराणा मालाचं बिल… तर कधी त्याच्याबरोबर गेलेल्या हॉटेलचं बिल… त्या बिलावरचे आकडे पुसट दिसतात हळूहळू  आणि तो ही आता सोबत नसतो…  पण त्याच्या बरोबर घालवलेला सुखाचा काळ… त्याच्या सोबतच्या गुजगोष्टी… त्याच्या सोबत पाहिलेली स्वप्नं… तो आणि त्याच्या आठवणी… त्या तर पुसट होत नाहीत ना कधीच. मग हात आपले शिस्तीत काम करत राहतात पसारा आवरण्याचं…पण मनाचं काय?  मनात पसरलेल्या आठवणींच्या पसाऱ्याचं काय?  कळत नाही त्या आठवणींना शिस्तीत बांधावं, की तसंच राहू द्यावं…पसरलेलं. पुस्तकांचं आवरलेलंच कपाट आवरायला घेतलं की, सापडतं काय काय त्याही कप्प्यात… स्वतःच्या पैशातून घेतलेलं पहिलं पुस्तक… 'सस्नेह‘ लिहून कोणी भेट दिलेलं पुस्तक… लेकीचं एखादं बडबडगीताचं इटुकलं पुस्तक… त्यातच एका पुस्तकावर नजर गेली की, मन हळवं हळवं होऊन जातं. लाडका कवी, त्याचं ते पुस्तक, त्याच्या कविता… पहिल्या पानावरची त्याची झोकदार सही… त्यानं भेट म्हणून दिलेला बुकमार्क… त्यावरचा त्याचा स्पर...
अधिक वाचा

मध्यरात्र

          बघ… तुझ्याबद्दल वाटणारी ही ओढ अजिबात स्वस्थ बसू देत नव्हती मला. हल्ली तर प्रत्येक प्रहर, प्रहरातले प्रत्येक क्षण तुझ्या वाटेकडे डोळे लावून बसलेली असायचे. अगदी आत्ताही बघ ना… मध्यरात्र झाली तरी डोळ्यांवर काही नीज दाटून येत नव्हती. पश्चिमेची गंभीर गाज निवळून आता हळूहळू पूर्वेकडून भूपाळी ऐकू येईल, सप्तर्षींची जागा आता हळूहळू शर्मिष्ठा घ्यायला लागतील; पण माझ्या डोळ्यातली टक्क जाग काही झोपेचं नाव घ्यायला तयार नव्हती. का? तर तू येशील… तू नक्कीच येशील असं वाटायला लावणारी तुझी ओढ. या माझ्या खात्रीला… का?… का म्हणून तडा दिलास रे तू? अर्ध्या तासापूर्वी तुझ्याकडून आलेला मेसेज वाचला आणि… आणि अक्षरशः हादरुन गेले रे. असं का वागलास माझ्याबरोबर सांग ना? झोप येत नव्हती म्हणून गच्चीत बसायला आले होते. पश्चिमेच्या खाऱ्या वाऱ्यासोबत मनाला शांत करणारे सूर ऐकू असं ठरवून वर आले होते रे आणि आता तू सांगतोयस मला की माझं तुझ्याबरोबर नसणं आता स्वीकार. स्वीकार… असं टाईप करण्याएवढं सहज शक्य आहे का ते? अरे, इतके दिवस तुझं अस्तित्व, तुझे श्वास मालकंसच्या सुरां...
अधिक वाचा

भाग एक

भाग एक त्यादिवशी संध्याकाळी इरा बागेतून घरी आली तीच अगदी गप्प गप्प. रोज भयंकर दंगा करत येणारी, गेटमधूनच आई, आई चा जप करत येणारी इरा, घरी परत आलेली आज आईला कळलंच नाही. इराच्या आजोबांना जेव्हा आत शिरताना पाहिलं तेव्हा आईला कळलं की आज काहीतरी बिनसलेलं दिसतंय. इराचा स्वभाव आईला माहीत होता. अशावेळी काही विचारायला गेलं तर ती उत्तर द्यायची नाही. म्हणून तिला काही न विचारता आईने आजोबांकडे मोर्चा वळवला.  'आज बागेत काही झालं का?' सूनबाईंचा तो प्रश्न ऐकून आजोबा म्हणाले, 'तसं तर काहीच झालं नाही. गेल्या गेल्या घसरगुंडीवर तर मस्त मजेत खेळत होती इरा. मित्र-मैत्रिणींशी नेहमीसारखा दंगा करून झाला. पण नंतर बाकी मंडळी घरी गेली आणि ही झोका घ्यायला गेल्यावर थोड्या वेळाने जरा अस्वस्थ दिसत होती खरं. मी विचारलंही तिला, पण आपल्याच तंद्रीत होती. काहीच बोलली नाही.' सांगेल जरा वेळाने म्हणून आई तिच्या कामाला लागली.  रात्री सगळं आवरून आई जेव्हा झोपायला खोलीत आली तेव्हाही इरा आढ्याकडे बघत गप्प पडली होती. आज जेवतानाही एकदम शांतता होती. इराला तसं पाहून आईच्या मनात थोडीशी कालवाकालव झाली. पण इराकडूनच काही ...
अधिक वाचा